Kampionatet e riplanifikuara evropiane të futbollit fillojnë në Romë të premten në atë që kryebashkiakja e qytetit, Virginia Raggi, e ka konsideruar si simbol të një fillimi të ri.
Andrea Bocelli do të këndojë “Nessun Dorma” para ndeshjes hapëse midis Italisë dhe Turqisë në stadiumin Olimpik dhe një fshat futbolli do të hapet në “Piazza del Popolo” në qendër të Romës.
Por edhe tifozët më të pasionuar të futbollit po përpiqen të vijnë në humor. “Atmosfera është pak e trishtuar,” tha Marco Martinelli, pronari i “Osteria Mamma Mia”- një restorant i vogël afër stadiumit në zonën e Flaminio ku kanë ngrënë lojtarët e AS Roma. “Ju nuk keni të gjithë entuziazmin që do të kishit zakonisht para një turneu të tillë … Unë nuk e ndiej ende entuziazmin.”
“Osteria Mamma Mia” dhe baret e restorantet e tjera në zonë zakonisht gëzojnë klientelë të mirë para ngjarjeve në stadium, por me numrin e shikuesve të kufizuar në 25% të kapacitetit, tregtia nuk do të jetë aq fitimprurëse sa ishte në të kaluarën.
Martinelli do t’i shfaqë ndeshjet e Italisë në restorant dhe tha se disponimi pa dyshim do të ngrihej nëse ekipi kombëtar, i cili ngriti për herë të fundit një trofe të kupës evropiane në 1968, paraqitet mirë.
Roma do të presë dy ndeshje të tjera të Grupit A – Italia kundër Zvicrës në 16 qershor dhe kundër Uellsit në 20 qershor – së bashku me një lojë çerekfinale në 3 korrik.
Për të akomoduar tifozët jashtë stadiumit, do të ketë ekrane të mëdha të vendosura në disa vende në qytet dhe autoritetet e Romës kanë vendosur një program të aktiviteteve gjatë muajit të ardhshëm, duke përfshirë muzikë live dhe shfaqje për historinë e Italisë në Euro.
Fshati i futbollit në “Piazza del Popolo”, që thuhet të jetë zona më e madhe e tifozëve në Evropë, mund të presë maksimumi 1,680 tifozë.
“Unë do të shikoj ndeshjet dhe padyshim që dua të shoh fitoren e Italisë, por gjithçka ende ndihet e lënë në hije nga pandemia”, tha Alessio, një shofer taksie, ndërsa shikonte punëtorët që vinin së bashku punimet e fundit në fshatin e futbollit të enjten pasdite. “Pak prej nesh po jetojnë mirë për momentin.”
