Gazeta spanjolle “AS” shkruan se kombëtarja iberike nuk do të ketë një qëndrim të këndshëm në Kosovë, ku ka mbërritur dje për të luajtur ndeshjen kualifikuese në grup me “Dardanët”. Këtë prognozë e bën nisur nga fakti se Spanja është një nga pesë vendet e vetme në Europë, së bashku me Sllovakinë, Greqinë, Rumaninë dhe Qipron që nuk e njohin shtetin më të ri në Ballkan.
“Për më tepër, yni është i vetmi vend në Bashkimin Europian që nuk pranon pasaportën kosovare për të marrë vizën për zonën Shengen. Fuqitë e mëdha si Rusia dhe Kina nuk e pranojnë as të ashtuquajturën Republika e Kosovës, por SHBA e kanë njohur, bashkë me shumë vende të tjera të përparuara.
Amerikanët kanë bazën më të madhe ushtarake në kontinent në territorin kosovar. Oferta për të pritur në masë refugjatët afganë ka forcuar marrëdhëniet midis Kosovës dhe SHBA, çka është më e rëndësishme për ta sesa fakti se janë ende 90 vende nga 193 të OKB-së që nuk kanë certifikuar pavarësinë e saj nga Serbia.
Krahina autonome e Kosovës dhe Metohisë, e cila shpalli pavarësinë e saj në mënyrë të njëanshme në pranverën e vitit 2008, pas një konflikti të armatosur në fund të shekullit të kaluar, pret kombëtaren e drejtuar nga Luis Enrique.
Në këtë skenar gjeo-politik, ndeshja mes Spanjës dhe Kosovës bëhet e zjarrtë. Për Spanjën kërkon guxim të madh, sepse pas rrëshqitjes në Stokholm, kufiri i gabimit është ezauruar. Për Kosovën ka frymëzime të tjera, sepse dëshiron ta kthejë ndeshjen në shpagim nacionalist.
Përtej refuzimit të Spanjës për t’i njohur ata si shtet, në Kosovë janë të shqetësuar që mediat iberike iu referohen atyre si Federata e Kosovës, duke shmangur në çdo kohë t’u japin statusin e një vendi. Ndërsa Spanja dëshiron ta lërë çështjen në atë gjendje që është, si një ndeshje futbolli, Kosova kërkon të krijojë një “casus belli” me të cilën do të tërheqë vëmendjen e të gjithë atyre që i mohojnë ato.
Vetë federata, duke ndjekur udhëzimet e qeverisë, pati një fërkim me homologen nga Kosova, sepse ata u ndjenë të injoruar në ndeshjen e parë, të luajtur më 31 mars në Seville. Ajo që të gjithë po pyesin është pse Spanja nuk kërkoi që Kosova të përjashtohej nga grupi i saj në shortin kualifikues. Kjo është bërë me Gjibraltarin.
Dhe është e zakonshme të bëhet me vendet që kanë papajtueshmëri politike ose diçka tjetër, siç ndodh midis Rusisë dhe Ukrainës, për shembull. Por, në kohën e hedhjes së shortit askush nuk e vuri re Kosovën. Dhe tani Spanja duhet të shkojë në Prishtinë e detyruar të mos dështojë. Ajo që duhet të jetë një ndeshje formale futbolli tani pritet si përplasje zjarri”.
