Policia njofton se ka arrestuar një 31-vjeçar i cili drejtonte mjetin në gjendje të dehur dhe qëllonte me armë zjarri në ajër.
Në pranga ka rënë Emiljano Norja ditën e djeshme rreth orës 20:00, në qytetin e Shijakut, pasi duke drejtuar në gjendje të dehur mjetin tip “Audi”, ka qëlluar edhe me armë zjarri në ajër duke rrezikuar jetën e banorëve. Si provë materiale u sekuestruan 1 armë zjarri kallashnikov, 1 krehër me 23 fishekë dhe automjeti me të cilën ky shtetas qarkullonte.
Njoftimi i policisë:
Shërbimet e Komisariatit të Policisë Shijak, pas një telefonate nga qytetarët në Sallën Operative, se në Shijak, një shtetas po xhironte gomat e makinës dhe qëllonte me armë zjarri, menjëherë kanë shkuar në adresën e dhënë, duke parandaluar ndonjë ngjarje të mundshme kriminale.
Forcat e Posaçme Operacionale në bashkëpunim me Forcat Shqiponja dhe shërbimet e Policisë Shijak, kanë bërë të mundur neutralizimin dhe prangosjen e shtetasit Emiljano Norja, 31 vjeç, banues në Shijak, i dënuar më parë për veprën penale “Mbajtje e lëndëve narkotike”.
Ky shtetas ditën e djeshme rreth orës 20:00, në qytetin e Shijakut, duke drejtuar në gjëndje të dehur mjetin tip “Audi”, ka qëlluar me armë zjarri në ajër duke rrezikuar jetën e banorëve.
Në cilësinë e provës materiale u sekuestruan 1 armë zjarri kallashnikov, 1 krëhër me 23 fishekë dhe automjeti me të cilën ky shtetas qarkullonte. Materialet i kaluan Prokurorisë së Rrethit Gjyqësor Durrës, për veprime të mëtejshme.
